ແຄນ ແມ່ນເຄື່ອງດົນຕຣີທີ່ຄຽງຄູ່ກັບຄວາມເປັນມາຂອງຊາດລາວເຮົາ,
ເຊິ່ງໃຫ້ສຽງທີ່ເປັນເອກະລັກ, ມ່ວນຊື່ນ, ອອນຊອນ ສາມາດເປົ່າດ້ວຍ ທໍານອງອັນເປັນເອກະລັກຕ່າງໆທີ່ຫຼາກຫຼາຍ.
ປັດຈຸບັນ, ການອະນຸລັກຮັກສາ-ສືບທອດ ວັດທະນະ ທໍາພື້ນເມືອງດັ້ງເດີມຂອງລາວ
ກຳລັງ ດໍາເນີນໄປຢ່າງຟົດຟື້ນ ແລະ ເປັນຂະບວນການ, ຊາວໜຸ່ມ-ເຍົາວະຊົນ
ຕ່າງກໍເລັງເຫັນຄຸນຄ່າຂອງມໍລະດົກທາງວັດທະນະ ທໍາທີ່ມີປະຫວັດຄວາມເປັນມາອັນຍາວນານນີ້
ພວກເຂົາມີຄວາມສົນໃຈທີ່ຈະຮຽນ-ສຶກສາ ແລະ ມີຄວາມກະຕືລືລົ້ນໃນການຮຽນເປົ່າເຄື່ອງດົນຕຣີຊະນິດນີ້.
ນອກຈາກນີ້ແລ້ວ, ພັກ-ລັດຖະບານ ຍັງໄດ້ມີນະໂຍບາຍສົ່ງເສີມ-ສືບຕໍ່-ເສີມຂະຫຍາຍສິລະປະວັດທະນະ
ທໍາ ອັນເປັນເອກະລັກຂອງຊາດ, ທັງຍັງສູ້ຊົນເພື່ອເຮັດໃຫ້ສຽງແຄນລາວ
ມໍລະດົກຂອງຄົນລາວ ກາຍເປັນສຽງແຄນຂອງຄົນທັງໂລກ ກາຍເປັນມໍລະດົກຂອງຄົນທັງໂລກ
ຈົນມາຮອດວັນທີ 7 ທັນວາ 2017
ແຄນລາວກໍໄດ້ຮັບການປະກາດເປັນມໍລະດົກໂລກທາງວັດທະນະ ທໍາທີ່ຈັບຕ້ອງບໍ່ໄດ້
ໂດຍອົງການການສຶກສາ ວິທະຍາສາດ ແລະ ວັດທະນະ ທໍາແຫ່ງສະຫະປະຊາຊາດ ຫຼື
ຢູເນສໂກ ນັບວ່າເປັນຄວາມພາກພູມໃຈຂອງປະຊາຊົນລາວທຸກເຜົ່າຊົນ
ບໍ່ວ່າຈະເປັນທັງພາຍໃນ ແລະ
ຕ່າງປະເທດທີ່ບໍ່ສາມາດຕັດຂາດອອກຈາກກັນໃນວົງຄະນະຍາດແຫ່ງຊາດລາວເຮົາໄດ້.
ເຖິງຢ່າງໃດກໍດີ, ການສຶກສາກ່ຽວກັບແຄນ ຫຼື ການຮຽນເປົ່າແຄນນັ້ນຍັງມີຂໍ້
ຈໍາກັດຢູ່ຫຼາຍດ້ານ ບໍ່ວ່າຈະເປັນທາງດ້ານວັດຖຸອຸປະກອນ, ຄູຜູ້ສອນ,
ຂໍ້ມູນ ລ້ວນແຕ່ຍັງບໍ່ທັນຕອບສະໜອງຕາມຄວາມຮຽກຮ້ອງຕ້ອງການຂອງສັງຄົມໃນປັດຈຸບັນໄດ້ເທື່ອ.
ດັ່ງນັ້ນ, ເມື່ອແນມເຫັນໄດ້ບັນຫາດັ່ງກ່າວ, ຂ້າພະເຈົ້າ
ໃນນາມນັກສຶກສາ-ປັນຍາຊົນ ຈື່ງມີຄວາມສົນໃຈໃນການສຶກສາຄົ້ນຄວ້າປະຫວັດຄວາມເປັນມາກ່ຽວກັບແຄນ
ແລະ ການເຝິກເປົ່າແຄນເບື້ອງຕົ້ນ
ເພື່ອເປັນບ່ອນອີງໃຫ້ແກ່ການເລີ່ມຕົ້ນທີ່ຈະຮຽນເປົ່າແຄນຂອງບັນດາຜູ້ທີ່ສົນໃຈ
ແລະ ມັກຮັກໃນການອະນຸລັກຮັກສາມູນມໍລະດົກຂອງຊາດທີ່ມີມາຫຼາຍພັນປີນີ້.
ໂດຍອີງໃສ່ຕຳນານທາງປະຫວັດສາດ, ປື້ມຕຳລາ, ເອກະສານ ແລະ
ຂໍ້ມູນຈາກອິນເຕີເນັດຈາກພາຍໃນ ແລະ ຕ່າງປະເທດ ທີ່ກ່າວເຖິງຂໍ້ມູນຂອງແຄນ, ຂ້າພະເຈົ້າ
ຈື່ງຄົ້ນຄວ້າ ແລ້ວ ຮິບໂຮມຂຽນ “ແຄນລາວ” ທີ່ກ່າວເຖິງ ປະຫວັດຄວາມເປັນມາຂອງແຄນໃນແຕ່ລະຍຸກແຕ່ລະສະໄໝ
ລວມເຖິງວິທີການເປົ່າແຄນເບື້ອງຕົ້ນ ແລະ ຂໍຂອບໃຈລ່ວງໜ້ານຳທ່ານຜູ້ອ່ານມານະທີ່ນີ້ດ້ວຍ
ไม่มีความคิดเห็น:
แสดงความคิดเห็น